Мағжан Жұмабаевтың өлеңдері түрік тілінде жарық көрді

Түркияның Кастамону қаласында қазақтың ұлы ақыны, Алаш қозғалысының қайраткері Мағжан Жұмабаевтың түрік тіліне аударылған туындыларының жинағы таныстырылды, деп хабарлайды «ҚазАқпарат» ХАА тілшісі.

Таныстырылым ақынның 125 жылдығына арналған салтанатты шара барысында өтті.

Жинақты түрік тіліне әйгілі ақын Әли Акбаш аударған. «Мағжанның өлеңдерінен репрессия жылдарындағы ақынның өз халқы үшін алаңдайтыны, сенімді болашақтан, жас буыннан іздейтіні анық байқалады. Ол алдағы ұрпақтың болашағы тәуелсіз елде өрбитінін жорамалдап кеткен», - дейді А.Акбаш.

Мағжан Жұмабаевтың қазақ тілі және бауырлас түркі халықтарының бірлігі туралы өлеңдері де аударылған.  

Бұған дейін хабарлағанымыздай, Түркияда әзербайжан сазгері Қара Қараевтың, қазақ ақыны Мағжан Жұмабаевтың және қырғыз жазушысы Шыңғыс Айтматовтың мерейтойларын және ТҮРКСОЙ халықаралық ұйымының 25 жылдығын атап өтуге арналған шаралар салтанатты түрде бастау алды.

15-16 ақпан күндері Анкара және Кастамону қалаларында ұлыларды еске алуға арналған концерттер мен жыр кештері өтті. Салтанатты шараны ТҮРКСОЙ бас хатшысы Дархан Қасейінов, Кастамону қаласының губернаторы және мэрі Яшар Карадениз бен Тахсин Бабаш ашты.

ӘДЕБИЕТ 18 ақпан 2018 г. 632 0